www.koczala.hiazintus.com 

Schlochau 16. November 1354

Wir bruder Wynrich von Knyprode homeister des ordins der brudere des spitals sendte Marien des dutzchen husis von Jerusalem, mit rate und willen der gebitere, vorlyen und geben unserm getruwen Claws Prusen und sinen bruder-sonen Patir, Cuniken, Mylos, Walther, Meynken, Hankin und ir aller rechten erben und nachkomelingen, XVI huben zcu Lankyn, gelegen bynnen den grenitzen, dy in bewist sint von unseren bruderen, zcu Culmischem rechte vry erbelichen und ewiclichen zcu besitzen. Dovon sullen sie uns thun ein platendinst zcu allen herferten, zcu allen lantweren, nuwe husir zcu buwen, alde zcu bessirn adir zcu brechen, wy dicke, wenne adir wohin sie von uns und unsren brudren werden geheysen. Und wenne ouch der ackir do-selbins cranck ist, so habe wir in sulche gnade getan, das sie uns jerlichen ia von iclicher huben geben sullen vor das pfluckorn eynen scheffil habirn <vor das pfluckorn> off sente Mertins tag des bischofis; und sullen dem bischofe ouch dovon thun, was im von rechte geborit. Worde ouch hernochmols an den egenanten XVI huben keyn gebrechen vunden an der maze, den welle wir in nicht schuldic sin zcu dirfullen. Wir gunnen ouch der egenanten lute og eynem manne alleyne zcu vischen in dem see Lankyn mit cleynem gezcow zcu der notdorft sines tisches. Czu gezcugnisse henge wir unser ingesigel an desin briff, der gegeben ist zcu Slochow in unsirs herren iaren M°CCC° iar in dem LIIII iare am nehisten sontage noch sente Mertins tage des bischofis. Gezcuge sint unsre brudere, her Heynrich von Bonenthin groskompthur, her Johan von Langerak treseler, Heynrich von Thabach kompthur zcu Slochow, her Wicbold unsir capplan, Wolff von Beldirsheim unser kumpan, und andere ersame lute.

Quelle: Paul Panske: Handfesten der Komturei Schlochau 1323-1466. Quellen und Darstellungen zur Geschichte Westpreussens. Danzig 1921

^nach oben ^

Startseite

Bücher

Texte

Alte Bilder

Urkunden

Links

Kontakt

Werbung